Fallega bláa skálin mín :)

Ég er alltaf svo sjúk í skálar af öllum stærðum og gerðum. Á "alltof" margar en ég hef not fyrir en maður má nú hafa dellu fyrir einhverju, ekki safna ég skóm eins og svo margar stallsystur mínar þannig að ég réttlæti þetta alveg fyrir sjálfri mér allavega. En ég keypti sem sagt stóra skál í Góða Hirðinum á 200 krónur fyrir örugglega 2-3 árum og fannst hún eitthvað svo flott en var aldrei búin að koma henni í notkun, það vantaði eitthvað.

Það var því tilvalið að taka upp spreybrúsann núna og prófa sig áfram. Ég keypti fallega blátt sprey (650kr) í Múrbúðinni fyrir stuttu síðan og ákvað að prófa að sjá hvernig hún kæmi út. Síðan setti ég blúndugardínu sem ég keypti líka í Góða Hirðinum á 200 kr og spreyjaði með hvítu yfir kantinn. Mér finnst hún alveg dásamlega falleg og rómantísk núna.

 Smá breyting :)
(getið klikkað á myndirnar til að sjá þær stærri ;)

Kveðja

Komin með lyklavöld :)

Jæja þá erum við "loksins" komin með lyklana af húsinu. Frekar spennandi !!!

Við ætlum að kíkja á það í dag og pæla aðeins í þessu öllu saman. Maður þarf að setja niður áætlun um hvað þarf að byrja á að gera og svona. Ég er svo skipulögð ;) Við munum svo koma til með að klæða húsið uppá nýtt og skipta um alla glugga, færa þá í upprunalegt horf. En í hjónaherberginu á efri hæðinni eru upprunalegir gluggar með einföldu gleri og allavega annar þeirra er brotinn. Það mun breyta húsinu til muna að fá sama "look" á það og var á því þegar það var byggt. Það verður gaman að sjá útkomuna

En fyrsta verkefnið mitt er að gera svefnherbergi drengjanna minna klár. Ég held að við Óliver séum komin á þá niðurstöðu að gera einhvers konar "superhero" herbergi fyrir hann. Þetta er fyrirmyndin sem við fundum á netinu sem við útfærum eftir.

 I am momma hear my roar

Herbergið hans Frosta er ég ekki alveg búin að ákveða hvernig á að vera, en allavega ætla ég að finna eitthvað sem kemur til með að passa svona næstu 2 árin allavega. Þangað til ég ákveð mig þá skoða ég hugmyndir og hér koma nokkur sýnishorn:

www.etsy.com

www.etsy.com

Grays gone wild

http://www.decorpad.com

http://www.homeinfurniture.com

 

 

Kveðja Birna

Skúffuskenkurinn úr RL vöruhúsinu ;)

Þennan skenk er ég búin að eiga lengi. Upphaflega var hann úr ómeðhöndlaðri furu en ég bæsaði hann í dökkum lit til að passa við dökka þemað sem ég var svo hrifin af á þeim tíma. En hann er/var í dag orðinn frekar upplitaður og hálf rauður bara þannig að mig langaði að gera eitthvað við hann því þetta er frábær geymsla.

Þar sem ég er að færa mig alveg yfir í hvíta litinn þá ákvað ég að byrja á því að mála hann bara hvítan. Síðan ætla ég að sjá til þegar hann er kominn á sinn stað í nýja húsinu hvort ég geri eitthvað meira við hann. Ég gleymdi að taka fyrir mynd en fann einhverja mynd þar sem hann var á, hún er samt aðeins óskýr en það sést allavega munurinn. Hér kemur fyrir og eftir mynd af gripnum mínum sem nú er eins og nýr :) jeiiii.....

Ég byrjaði á að taka allar höldur af og grunna gripinn. Ég fór 2 umferðir af grunni til að ekkert af brúna litnum myndi ná í gegn. Síðan sparslaði ég í ójöfnur og sandaði létt yfir. Að lokum fór ég 2 umferðir með hvítri olíumálningu og vá hvað þetta er lengi að þorna :) ekki fyrir óþolinmóða en það hafðist og ég er bara hæstánægð með nýja húsgagnið mitt. Prófaði að stilla upp með speglinum sem ég er að mála líka, en hann er ekki alveg tilbúinn. En þetta er farið að lúkka vel.

Kveðja Birna

P.S. Mér hefur alltaf fundist þessar höldur svo flottar og þær fá að njóta sín svo miklu betur núna.

Fyrsta verkefninu lokið

Það var flotti kirkjuspegillinn minn sem fékk fyrstu yfirhalninguna. Ég er búin að eiga þennan í tæp 10-12 ár sennilega en ég var voðalega mikið í að safna mér hlutum í þessum dökka við. Á þessum tíma var búðin Jón Indíafari meðal annars mjög vinsæl en við mamma vorum einmitt með alls kyns muni frá Indónesíu til sölu í gjafavöruversluninni HelguKrók á Bíldudal. Þar á meðal var þessi spegill sem mig minnir meira að segja að foreldrar mínir hafi gefið mér því ég var alveg dolfallin yfir honum.

Nú hefur hann fengið endurnýjun síns líftíma og mér finnst hann koma ljómandi vel út. Þetta shabby chic look finnst mér rosalega heimilislegt og krúttlegt. Hvað finnst ykkur?

Fyrst var hann svona án þess að sanda hann:

Frekar eitthvað steríll eitthvað finnst mér þannig að ég prófaði
að sanda hann létt á hliðum og á útskurði.

Much better. Heimilislegt, notað og fallegt :O)

Kveðja Birna

Sprey-æði

Ég hef verið að skoða svo margar hugmyndir þar sem gamlir og "ljótir" hlutir eru spreyjaðir og eignast þar af leiðandi nýtt líf. Þetta er svo einfalt og auðvelt að gera, um að gera að nýta hlutina sem maður á fyrir. Ég hef verið að nota sprey frá Flugger sem ég fékk í versluninni Vesturljós á Patreksfirði en það var á um 1500 krónur sem er nokkuð normalt verð, Húsasmiðjan var til að mynda með hærra verð. En svo fór ég á stúfana þegar ég fór suður í leit að fleiri litum og fann þá fyrst sprey í Euroshopper, það fékkst á 759 kr en var ekki í mjög mörgum litum. Besta verðið fann ég svo að sjálfsögðu í Múrbúðinni, sem fer að verða ein af mínum uppáhaldsbúðum í Reykjavík :) en þar fást öll sprey á 654 kr og margir litir í boði. Mæli með að þið spreyóðu lesendur kíki þangað.

Ég er nú þegar byrjuð að spreyja og mun setja inn myndir af því við fyrsta tækifæri en hér eru fyrir myndirnar af nokkrum hlutum sem ég er byrjuð á:

 

 Kirkjuspegillinn minn, sem ég er búin að eiga lengi

 Stóri viðar spegillinn sem ég hef átt í mörg ár

Fékk 2 svona blómasúlur í Kolaportinu fyrir 10-12 árum

Gömul búdda stytta sem er orðin upplituð og komin til ára sinna ;)

Þessa tvo gullvasa fékk ég á einhverri rýmingarsölu í Húsasmiðjunni fyrir nokkrum árum. Þeir fengust á aðeins 300 kr stykkið minnir mig. Ég er orðin eitthvað leið á þeim núna og ætla að prófa að spreyja þá.

Takk fyrir innlitið.

Kveðja Birna

Velkomin á króksbloggið

Við fjölskyldan erum að festa kaup á gömlu timburhúsi frá árinu 18960 sem við fáum afhent 1. september. Það þarf ýmislegt að gera við það en líka margt sem við viljum bara breyta, þó það sé kannski ekki nauðsynlegt :) en vilja það ekki allir?

Ég hef verið alveg niðursokkin í að skoða bloggsíður undanfarna mánuði með hinum ýmsu hugmyndum, fyrir/eftir myndum, breytt húsgögn, DIY, saumasíðum, prjónasíðum og you name it. Maður getur alveg misst sig í að skoða þetta allt saman, og allt langar manni auðvitað að gera. En á þessari síðu ætla ég að sýna ykkur þær breytingar sem við komum til með að gera á húsinu okkar ásamt fleiri verkefnum sem ég tek mér fyrir hendur.

Vona að einhver hafi gaman af því að fylgjast með þessu hjá ykkur og endilega skiljið eftir athugasemdir svo maður viti hverjir eru að fylgjasts með.

Ég læt fylgja með hér nokkrar hugmyndir sem ég hef heillast af, kveðja Birna

Sniðugur bekkur gerður úr kommóðu

Falleg breyting á stofuborði

Flottur veggfóðraður glerskápur

Svo svo fallegt.... love